Чәршәмбе көнне «Казан Экспо»да старт алган Фиджитал Уеннар алдыннан алдынгы федераль һәм республика массакүләм мәгълүмат чаралары вәкилләре һәм блогерлар катнашында пресс-тур үткәрелде. «Спорт һәм социаль проектлар дирекциясе» КБАО генераль директоры Максим Денисов турда катнашучыларга Уеннар ярышлары узачак урынын күрсәтте, һәм фиджитал-футбол, фиджитал-баскетбол, Beat Saber һәм дрон ярышларда турнир үткәрү кагыйдәләре турында җентекләп сөйләде.
Беренче Фиджитал Уеннар Казан шәһәрендә 2022 нче елның 21-23 сентябрь көннәрендә узачак. Спортчылар беренчелекне дүрт дисциплинада уйнатачак: фиджитал-футбол (FIFA + футзал), фиджитал-баскетбол (NBA + стритбол), Beat Saber һәм дрон ярышлары.
Ярышлар 2024 нче елда Казан шәһәрендә узачак зур масштаблы технологик турнир Киләчәк Уеннары алдыннан үткәреләчәк.
«Без бу форматның тамашачылар арасында популяр булачагына шикләнмибез. Бу ярышларда без шулай ук аларны безнең спорт җәмгыятебез өчен ничек тагын да матуррак һәм кызыклырак итеп ясарга икәнен курәсебез килә. Трансляциягә аерым басым ясала. Бездә 20 дән артык камера эшли, ярышлар VK Play һәм ВКонтакте платформаларында трансляциягә чыгачак (сез ярышларны сылтама буенча карый аласыз). Безнең өчен бу шулай ук видео материалны күрсәтү ягыннан билгеле бер тәҗрибә. Кызыклы үзенчәлекләрнең берсе – цифрлы киенү-чишенү бүлмәсе. Катнашучылар чынбарлыктан виртуаль дөньяга күчәчәк, һәм без аны экраннарда күрәчәкбез», – диде Максим Денисов.
Фиджитал-футбол һәм фиджитал-баскетбол кагыйдәләре буенча, спортчылар башта FIFA/NBA спорт симуляторында көч сынаша, аннан соң чынбарлыкта футзал яки 3х3 баскетбол уйный. Матчларда тупланган балларның суммасы чыгарыла, шуңа күрә катнашучылар дисциплиналарның икесендә дә үз осталыкларын күрсәтергә тиеш.
Фиджитал-футбол уеннарында 2Drots һәм Амкал футбол медиа лигасы командалары вәкилләре Эдамс “Эд” Скляр, Александр “Алекс Стиль” Степанов, Андрей «Belka» Белов катнашачак, шулай ук «Tamo Junto» командасының Бразилиядән килгән медиа-блогерлар катнашачак. Студентлар арасында футзал буенча дөнья чемпионы Вадим Цай һәм FIFA буенча Россия чемпионы Даниил Абельдяев шулай ук Фиджитал Уеннарында катнашачак.
Баскетбол ярышларында Россия һәм Беларусь Республикасы яшьләр җыелма командалары катнашачак.
«Фиджитал чаралар үткәрү барышында кагыйдәләр хәрәкәтчәнлек һәм кызыклылык ягыннан яхшыртылачак. Ноябрь аенда без башка спорт төрләрендә цифрлы ярышлар үткәрергә ниятлибез. Цифрлы хоккей, картинг һәм башка берничә спорт төрен яхшы итеп үткәрүен өйрәнәсебез килә», – диде Максим Денисов.
Дрон ярышлары стартына Россия, Төркия һәм Болгария спортчылары чыгачак.
Шул рәвештә, Россия, Беларусь Республикасы, Бразилия, Болгария һәм Төркия илләрен кертеп исәпләгәндә, беренче Фиджитал Уеннарда биш илдән килгән спортчылар көч сынашачак.
«Фиджитал Уеннар өчен катнашучыларны сайлаганда, оештыручылар массакүләм мәгълүмат чараларында һәм кибер киңлектә цифрлы спорт төрләрендә уйнау осталыгына танылган спортчыларга төп игътибар юнәлтте. Без Уеннар белән кызыксыну китерәчәк искиткеч күренеш һәм көрәш кызуын алырга тиеш», – диде Максим Денисов.
Фиджитал Уеннар ярышларының приз фонды 6 миллион сум булачак. Традицион медальләр урынына җиңүчеләргә истәлекле бүләкләр – фиджитал билгесе рәвешендә ясалган статуэткалар тапшырылачак.
«Казан Экспо» аренасында трибуналарның сыйдырышлыгы – 400 кеше. Түләүсез билетларны сылтама ярдәмендә сайтта теркәлү үткәннән соң алырга мөмкин: https://kzn.kassir.ru/bilety-na-sportivnye-meropriyatiya
