Популяр блогерлар һәм алдынгы спорт ММЧ журналистлары беренче булып «Казан Экспо»да фиджитал-футбол уйнады. Дуслык матчы сишәмбе көнне Фиджитал Уеннар үтәчәк мәйданда узды. Катнашучылар арасында танылган блогерлар Туран Гатауллин, Алмаз “Стронг”, Алина “Мисс Рисовски”, Айрат Шакуров, Алия Магдеева һәм Азат Кашапов бар иде.
Башта командалар FIFA Volta спорт симуляторында уйнады һәм ачык төсле майкалардан киенгән катнашучылар 3:0 исәбе белән җиңде.
Матчның икенче өлеше футзал кортында үтте һәм карадан киенгән команда уенны үз файдасына саклап калырга якынлашты. Алар 5:2 исәбе белән алдан барды (гомуми исәбе 5:5), ләкин очрашу тәмамлануга 20 секунд калганда, ачык төстәге команда мөһим гол кертте һәм 6:5 исәбе белән җиңде. Матчның барлык катнашучыларына истәлекле сувенирлар тапшырылды.
«Фиджитал-футбол минем көткәннәремнән артты. Бу яңа, кызык һәм бик мавыктыргыч. Минем FIFA карьерам 2006 елда тәмамланды, шуңа күрә безгә матчның беренче өлешендә уен практикасы һәм футбол кырында тагын берничә минут җитмәде. 2024 елда Киләчәк Уеннары алдыннан үч кайтарырга өметләнәм!» – матчның беренче голын керткән РИА Новости корреспонденты Вадим Кузнецов тәэсирләре белән уртаклашты.
«Бу матчтан иң уңай хисләр калды, бигрәк тә мин җиңү голын керткән сәбәпле. Уенның беренче өлешеннән соң 3:0 исәбе белән беренчелекне алгач, бераз хәлсезләндек. Көчсезләнеп паркетка чыктык, безгә гол керттеләр, шулай итеп без көндәшебезгә исәпне тигезләтергә мөмкинлек бирдек, аннан соң гына яхшырак уйный башладык. Гомумән алганда, мәйданчыкта спортчылар алдыннан уйнап карарга рөхсәт булуы бик шәп иде», – диде Туран Гатуллин.
Чәршәмбе көнне Фиджитал Уеннарында фиджитал-футбол турниры башланачак, анда танылган 2Drots һәм «Амкал» медиа-лига командалары, Бразилия медиа-блогерлары, шулай ук студентлар арасында футзал буенча дөнья чемпионы Вадим Цай һәм Россиянең FIFA чемпионы Даниил Абельдяев чыгыш ясаячак. Ярышларга «Амкал» капкачысы, танылган блогер Федор Маслов һәм Роман Титов («Матч ТВ») аңлатма бирәчәк.
Беренче Фиджитал Уеннар Казан шәһәрендә 21-23 сентябрь көннәрендә узачак. Спортчылар беренчелекне дүрт дисциплинада уйнатачак: фиджитал-футбол (FIFA + футзал), фиджитал-баскетбол (NBA + 3х3 баскетбол), Beat Saber һәм дрон ярышлары.
Уеннар VK Play http://vkplay.ru һәм VKontakte http://vk.com/gamesofuture платформаларында трансляциягә чыгачак. Ярышларны http://gof.vkplay.ru сылтама буенча карый аласыз.
