Казан Су спорт төрләре сараенда илнең 15 яшьтән олырак булган иң көчле спортчылары арасында синхрон йөзү буенча Россия чемпионаты ачылды.
Чемпионатта 19 командадан 300 синхрон йөзүче, Россия Федерациясенең 11 төбәге вәкилләре, шулай ук Россия җыелма командасы (төп һәм яшүсмерләр командалары) һәм Беларусь Республикасы спортчылары катнаша. Чемпионатның өч көнлек программасына техник һәм ирекле программалар (соло, дуэт, катнаш дуэт, төркем), комби һәм акробатик төркемнәр ярышлары керә.
Синхрон йөзү буенча Россия җыелма командасының баш тренеры Татьяна Покровская Казанда ярышлар уздыруның яхшы шартларын билгеләп үтте.
«Бу шәһәр безнең өчен бәхет китерүче. Монда һәрвакыт ягымлы кешеләр, җылы каршы алу, ярышлар үткәрү өчен яхшы шартлар була. Бу Олимпия уеннарыннан соң сезонда беренче Россия чемпионаты, ул да игътибарга лаек. Катнашучыларның югары дәрәҗәдә әзер булулары гаҗәпләндерде. Яңартылган җыелма команда өчен бу старт бик мөһим, һәм кызлар өметләребезне өзмичә Олимпия программасын бик яхшы башкардылар».
Татьяна Николаевна Покровская шулай ук Россия спортчыларының югары мотивациясен һәм яңа ярышларга актив әзерләнүләрен билгеләп үтте: «Без составыбызны яңартабыз, Олимпия составыннан Колесниченко һәм Субботина гына калды. Яңа программалар әзерләнә, техника яхшы итеп өйрәнә. Эш бик кызу бара».
Россия синхрон йөзү федерациясенең беренче вице-президенты Ольга Брусникина Татарстан Республикасына ярышларга әзерләнү һәм чараны үткәрү өчен рәхмәтен җиткерде.
«Казанда ярышлар һәрвакыт югары дәрәҗәдә оештырыла һәм хөрмәт белән үткәрелә, без монда бик рәхәтләнеп киләбез. Төбәкләрдән килгән катнашучыларны безнең зур йолдызлар белән бер бассейнда ярышу һәм Татьяна Николаевна Покровская кебек тренерлар белән бер чарада булу бик шатландыра».
Быел синхрон йөзү буенча Россия чемпионатында Беларусь Республикасыннан синхрон йөзүчеләр дә катнаша. Беларусь Республикасының синхрон йөзү җыелма командасының баш тренеры Елена Светличная Татарстан башкаласында җылы каршы алу турында сөйләде.
«Казанда тамашачылар һәм оештыручылар бик дуслыча каршы ала. Югары дәрәҗәдәге объектлар. Безнең спортчылар Казанга килеп, яңа программалар күрсәтүләренә бик шат. Алга табарак эш тагын да кискенләшер».
«Россия синхрон йөзү федерациясе – бөек федерация! Составына шулкадәр Олимпия чемпионнары керә. Заманалар авыр, ләкин темпны арттырырга кирәк, һәм бүген күрсәтелгән нәтиҗәләр ышаныч уята. Синхрон йөзүнең популярлаштыруы күренә – моның өчен мастер-класслар, автограф сессияләре үткәрелә», Ольга Павлова, Россия синхрон йөзү федерациясе вице-президенты, дип әйтте.
Татарстан Республикасы спорт министрының урынбасары Илдар Садриев:
«Күп еллар буена без синхрон йөзү буенча Россия чемпионатын кабул итәбез. Быел Беларусь Республикасы командасын күрүебезгә бик шатбыз. Татарстан Республикасы Спорт министрлыгының, «Спорт һәм социаль проектлар дирекциясе» КБАО һәм Татарстан Республикасының синхрон йөзү федерациясенең яхшы координацияләнгән эш сәбәпле синхрон йөзү популярлаштырыла, һәм синхрон йөзү белән шөгыльләнә башлаган кешеләр саны арта бара».
Исегезгә төшерәбез, синхрон йөзү буенча Россия чемпионаты тамашачылар катнашында уза. Синхрон йөзү федерациясе сайтында https://synchrorussia.ru/kalendar/2022/chemp-rossii-2022 ярышлар программасын карап була. Билетлар https://kzn.kassir.ru/ сайтында, шәһәрнең Kassir.ru кассаларында, шулай ук Су спорт төрләре сарае кассасында сатыла. Билет бәяләре 300 һәм 400 сум, һәм бөтен ярыш көне өчен гамәлдә. Билетларга ташламалар системасы бар.
“Спорт һәм социаль проектлар дирекциясе” КБАО матбугат хезмәте